Poques coses hai más tradicionales n’Asturies que la sidra. Y enantes de la sidra tenemos la mazana, asina que ta nidia que la tradición de la que vamos falar güei ye ún de les más importantes pa la cultura de lo nueso: pañar mazana.
Los conceyos más sidreros d’Asturies de xuru tan avezaos a esti conceptos y nun sedrá nenguna novedá pa ellos dicir que la época pa esta actividá estiéndese pela seronda. Ye dicir, dende setiembre hasta entamos d’avientu. Conceyos bien sidreros como Villaviciosa celebren esta época con una guapa folixa a entamos d’ochobre (el festival de la mazana), anque esti añu nun puede celebrase por mor del COVID. Según los expertos ye importante que la mazana se faiga en tiempos más fríos, que ye lo que va favorecer dempués a la elaboración de la sidra.
A la hora de pañar la mazana, lo habitual ye garrala del suelu y non recoyela del árbol. Pa esto ye habitual un procesu que se conoz como “llimir pumares”, que consiste en ximelgar les rames de la pomarada con una vara pa favorecer la cayida de les mazanes y pañales dende’l suelu. La cantidá de mazanes que puedan pañase nun xornada depende de la maquinaria que vaya usase pa eso: les más cencielles pañen les mazanes en caxes de 25 kgs o sacos de 50 kgs que van descargase dempués a mano a un remolque o en caxes recolectores de 300 kgs. con mecanismu hidráulicu que ye a elevar y bascular la mazana a un remolque. Otres más sofisticáes aspiren la mazana directamente del suelu y faen que lleguen a un remolque mediante unes cintes transportadores.
Un esfuerzu notable que los nuesos granxeros faen cada año pa que podamos disfrutar de algo tan de nueso como un auténticu culín de sidra asturiana.
