Nel pueblu de Vedrine, conceyu de Trilj, na Dalmacia croata, lo mesmo
n’otros pueblos y conceyos vecinos, como’l d’Otok, celébrase un antroxu,
alredor del 15 de febreru, nel que pueden vese les figures del “Didi”, que son mui,
mui asemeyaes, a les de los guirrios. Represéntense como si fueren oveyes, un rebañu,
la oveya negra, los machos, lleven cucuruchos fechos con pelleyos d’oveya remataos
en cuernos, asemeyando carneros, y raos. Los traxes tán fechos con munches cinches de
colorinos. Los cucuruchos, de sobre metru y mediu d’altor, llévenlos encontaos con un
palu pa qu’aguanten derechos, y van faciendo sonar esquiles. Arriendes, van xuntu a
la representación de La Vieya, que lleva’l so fusu de filandera, y que ye símbolu d’
antigües divinidaes venceyaes a la Madre Tierra creadora, l’iviernu, la ñeve, etc. Nos
desfiles y procesiones puede vese la teatralización de la fertilidá ente mascaritos
Didi, los machos cabríos, y La Vieya, el ciclu anual de morrer/renacer, lo vieyo y lo
nuevo, la vieya/moza, Demeter/Persefone, iviernu /primavera.
N’Eslovenia, en Ptuj, conozse la figura del Kurent, coles mesmes traces,
llevar esquilones nun cinchu, mascaritu con cinches de colorinos, y vestíu de pelleyes
d’oveya.
En Sardinia esisten otros mascaritos d’antroxu venceyaos a esti ámbitu, los Mamutzones
de Samugheo, que depende de la población pueden llamase tamién Su Maimulu o
Maimones. LLeven pelleyos d’oveya negra y cabres.
N’Euskadi, nos pueblos navarros d’Ituren y Zubieta, esiste’l personaxe del
Ioaldun, que va vestíu de pelleyos con esquilones, cucuruchu rematáu con plumes de
faisán y cinches de colores, y un llátigu fechu de cola de caballu. Salen na última
selmana de xineru.
Pa contra Cantabria, nel festexu de La Vijanera, en Silió, conozse otru antroxu nel
qu’apaecen personaxes vestíos con pelleyes y esquilones, los zarramacos o
zamarrones.
Esisten otros munchos exemplos, y ente ellos hai que meter a les figures qu’
apaecen como diaños, y seres maléficos cornudos, ya que suelen ser variantes de
machos cabríos demonizaos pol cristianismu, como’l Krampus nos países
alpinos, que representa’l mal, pol contrariu de San Nicolás.
