Delfín Valdés, más conocíu como Delfo, (L’Entregu, 1975) dedica tola so vida a la cultura onde la música foi la so meyor compañera de viaxe. Nueches celtes, participación activa n’asociaciones culturales, programes na radio, monólogos, obres de teatru y asina un cientu d’eventos. Delfo cofundó un grupu de teatru «Biesca Xabaz». Pon la voz de la banda La Tarrancha creada en 2003 y tamién formó parte de les grabaciones de «Músicos pola oficialidá». Con estos proyectos tien grabaos alredor de nueve discos o diez. Al nuesu polifacéticu invitáu da-y entá para tener una parte creativa al traviés del diseñu gráficu, col proyectu ProyeutuKraken.
Un llugar pa perdese una fin de selmana…
Si la cosa ye perdese, ye cuestión d’improvisar, nun faer planes y descubrir o redescubrir, perdese y saber topase. Unos díes pal oriente, otros pal ocidente, pa la mariña o pal monte. Tamién hai que saber perdese alreor de casa. Por suerte hai munchos fines de selmana nesta vida, lo suyo ye poder aprovechalos.
Un llugar pa vivir…
Asturies.
Un platu…
Verdura, que ye como llamamos na cuenca al pote de borrachón o de berza, o non espera, pote castañes. ¿O meyor fabes? Bueno, ¿o pulpo a feira? Pera pera, bonito en rollu de lo que fai mio ma. Anque tamién unes patates frites con chorizu y un güevu… Meca, ¡oricios! O Llámpares, pero ensin chorizu nin xamón. Pera non, ¡cebolles rellenes con patates frites! Ummm ¿boroñu prabau? Uff poneis preguntes perdifícles.
Un postre… Pa mi, quesu. Los asturianos gústenme toos. De fuera… de fuera toos tamién, hehehehe.
Una playa pa pasar el día. Meca otra h.odía. Playes d’Asturies conozo milenta y, fuera Asturies, otru tantu. Anque yo na playa lo que más faigo ye tar nel agua, echo hores pela mañana y hores pela tarde. Un sitiu pa bañame, El Gayo de Lluanco.
Un pueblín que nun podemos dexar de ver…
Por dicir un, que podía dicir munchos, Vil,lar de Gal.legos, nel valle de Cuna y Venera. Conceyu de Mieres.
Un chigre pa tomar unos culinos…
En L’Entregu, El Concheso de va mas de venti años. Anguaño, nel mio pueblu entá tienes dellos bien afayaizos, L’Allume, El Zamorano, El Florida, El Coto… En Xixón el Canteli y el Dakar (y tolos que me queden pa conocer).
Un parque natural pa visitar…
Redes.
Una fiesta a la que nun faltar…
La Noite Celta de Porcía.
Un muséu pa recomendar…
L’Etnográficu de Grandas de Salime.
Un momentu de la hestoria d’Asturies que te prestaría vivir…
Na, el que me toca vivir. La Hestoria tócanos facela a nós.
Un baille pa pasalo bien…
Toos!!
Igual me pasé, hai ca cosa per ende… que val más nin mentalo.
Una pallabra n’asturianu que te preste…
Naguar. Naguar poles coses riques, poles coses guapes, por topase cola to xente, por viaxar, por baillar, por cantar… y naguar por tomar un culete!
Una tradición que nun pue perdese…
Aprovechando la estación… l’amagüestu.
Una espresión n’asturianu que te preste…
«Como caigas y te manques, de postre, vas llevales!». Tien muncho aquello la frase esta. Un mecigayu ente preocupación y empatía, pero tamién d’autoridá materna y muncha mala hostia.
