De los trés centenares de gargantes o foces, el Desfiladeru de Los Arrudos ye de lo más guapo que puede contemplase nuna bona caminada.

Vamos partir dende la localidá de Coballes (Casu), tomando un ramal que nos conduz a la típica aldega de Caliao, siguiendo'l ríu d'igual nome. A los pocos quilómetros vamos dexar a la izquierda la carreterina que va a l'aldega de La Felguerina, que paga la pena visitar. Si disponemos de tiempu per esa zona sal una pista escontra'l llagu Ubales, pola que foi d'antiguo una calzada romana o vía histórica.

En Caliao vamos entamar la caminada per una caleya o pista que conduz a un área recreativa y a la ermita de San Antonio. D'ellí sal el camín a la mayada de Cotu Fresnéu. Aprosimao vamos tardar una hora en llegar a les cabanes de pastores d'esta vega, una de les más formoses de les tierres casines. Amás de la citada ermita, un pocu desapercibida pal viaxeru, tamién vamos poder ver un antiguu molín d'agua, anguaño fora de serviciu.

Dende Cotu Fresnéu vamos siguir per un camín que nos asitia al pocu tiempu a les puertes del formosu Desfiladeru de Los Arrudos, formáu pel ríu del mesmu nome. Baxa de lo alto de los puertos de Contorgán, nes llendes asturleoneses del Cordal Cantábricu.

Vamos xubir pol empedráu senderu, embaldosáu con grandes piedres planes. Hai quien cree que foi una sienda o calzada romana que baxaba de San Isidro.

Vamos cruciar el ríu por singulares pontes, llamaos La Calabaza de Riba y La Calabaza de Baxo. Tres una hora de xubida, llegando a la parte de La Fontona vamos poder dar per rematada l'ascensión, ellí rematen Los Arrudos. Anque'l senderu sigue hasta los citaos puertos de Contorgán y San Isidro. Amás de les mayaes de La robre y Rexecu (dende onde se llega a los llagos Ubales, La Caballuna, Piornal, Torres, Cuetu Lladrón y Llaguiellu). Tamién hai senderos que van hasta'l Picu Retriñón, Monte Llaímo y mayaes de La Valencia y La Felguera, nes llendes de los conceyos vecinos de Casu y Ayer.

Esta ye una zona na qu'abonden les fayes y los xardones. Abelugu natural de urogallos, llobos, venados, corzos, jabalíes y robecos.

En La Fontona, llugar ideal pa comer a la vera del ríu, hai una canalización d'agües pa Xixón. El proyectu ye del añu 1926, anque nun se terminó hasta 1944, y entró en funcionamientu un llustru dempués. Esta trayida d'agües garantiza que na Villa de Xovellanos téngase agua a esgaya. Tien un caudal d'unos doscientos llitros per segundu, más de setecientos mil llitros a la hora. La tubería hasta Xixón, ye de casi sesenta kilómetros de percorríu y pasa pela falda del cordal de Peña Mayor, ente otros montes y sierres.

El regresu a Caliao aconseyamos faelo pol mesmu itinerariu, baxando tranquilamente por Los Arrudos. Tenemos de parar dalguna vegada pa contemplar la Naturaleza (non too tien que ser andar y andar ensin sentíu). Asina vamos poder ver nos altos roquedales a los gráciles robecos, si la suerte acompáñanos y nun vamos dando voces.

Nun quedes ensin descubrir más rutes, equí en VerAsturies.