La seronda n’Asturies ye sinónimu de la época del amagüestu, una fiesta pagana que paez que tien el so orixe nes tribus celtes, cuando pañaben les castañes peles viesques, na que ye la última época de tierra fértil del añu.
La costume de los celtes yera comer les castañes asaes pa lliberar les almes de los purgatorios, porque cada castaña simbolizaba un alma d’un difuntu. Hai quien diz qu’al terminar tiraben les castañes al suelu diciendo “¡Esto ye pa que xinten los difuntos!”. Por supuestu, les castañes teníen de ser asaes primeru, yá que’l fueu purificaba estes “almes”, amás de da-yos un sabor bien prestosu.
Anguaño, seguimos comiendo eses castañes asaes en compañía de collacios y familiares nun ambiente prestosu, colocando les casteñes al fueu y pegando-yos un ximielgu con un palu pa que reciban dafechu el calor. Al terminar esfrutamos del so sabor moyando’l gargüelu con un vasín de sidra dulce, esa que tanto-yos presta a los neños, igual qu’el xugar nel prau al aire llibre, en metá de dalguna viesca recibiendo los últimos rayos de sol del añu. Y ye que la sidra dulce acabó dándo-y un añadíu especial a esta costume celta, faciendola prestosa y recomendable pa xente de toles edaes. Porque la sidra dulce nun-yos presta namás qu’a los guah.es, tamién a los pás, a les más, a los güelos y a les güeles. Una oportunidá de tener una guapa xinta folixera nel práu o en casa con tola familia al que n’algunes zones xúnese el baile de la Danza Prima.
Anque ye verdá que nos últimos años esta tradición nun ta yá tan estendida, son dellos los medios nos que ta recuperándose, sobretou n’ámbitos escolares, con un evidente sentíu de dar a estes celebraciones un significáu d’identidá. Pero nestos tiempos nos que salir nun paez la opción más recomendable, ¿qué meyor qu’asar una castañes en casa y acompañaos de sidra dulce, reviviendo esta tradición tan guapa?
