El dramaturgu, actor y director Maxi Rodríguez, nació en Mieres nel añu 1965. Cuenta con ésitos nel mundu del teatru, el cine y la televisión. Trabayó en toos estos medios en distintes disciplines, incluyendo la de guionista en series tan famoses como «Siete Vidas». Gracies a esti trabayu, llogró un Premio Ondas.
Nel mundu de la televisión tamién tuvo presencia en «Policías», «Periodistas», «Hospital Central», «Aquí no hay quien viva» o «Doctor Mateo» . Nel cine, destaca'l so trabayu en «Gordos», «Los muertos no se tocan, nene» o «Carne de gallina».
Nos años ochenta formó parte de la compañía «Toaletta» na que consiguió dellos premios nacionales como «La Espiga de Oro», el Premio Borne» o el «Marqués de Bradomín».Tamién hai que destacar que dirixió l'espectáculu «Abocados» nel Centru Dramáticu Nacional.
Anguaño imparte cursos tantu de teatru por toa España como de comunicación pa empreses o espresión dramática pa profesores. Tamién publica llibros tantu teatrales como d'humor. Ente los sos títulos destaquen «Parando en Villalpando», «Como estaba cansada, me atasqué» y «Cómo ye lo nueso». Nel añu 2016, convirtióse nel primer dramaturgu asturianu n'estrenar una obra escrita en euskera, gracies a ella punxo'l broche d'oru a San Sebastián 2016, capital europea de la cultura.
