Foi apagándose de adulces. ‘Tola’, la esbardina que foi, al pie de la so hermana ‘Paca’, el símbolu del caltenimientu animal y la llucha escontra'l furtivismo n'Asturies, morrió va trés años esta selmana na so corralada del monte Fernanchín. Tenía casi 29 años -d’una esperanza de vida a de venticinco- y una hestoria forxada a sangre y fueu a los sos llombos.

Una carnicería

Xunu de 1989. Una de les mayores operaciones escontra la caza furtiva remata col afayu d'innumberables restos animales en dellos pueblos de Cangas. El día 13, en portada de ‘La Nueva España’, Ángel Álvarez informa de que'l botín compúsose de «delles cabeces de urogallu, robecu y corzu, y tou tipu de foines y trampes», paquetes de goma-2 incluyíos, lo mesmo que de la piel de cuatro osos -naquel momentu quedaben malpenes un centenar en tol cordial Cantábricu y tan solo unos cincuenta n'Asturies-, unu de los cualos atópase calteníu en salazón. L'oxetivu: comer la so carne. El mesmu que-yos aguardaba a les dos esbardes que, entá vives, aguardaben a ser apurríes al Seprona nun improvisáu corral ente les ruines del monesteriu cuartanu de Oubona. Tienen apenes cinco meses d'edá y nome que-yos punxeron los sos captores, ‘Selva’ y ‘Charly’, enantes de proponer matales y sirviles como menú. 

La noticia llegó a oyíos de la persona incorreuta. O correuta, según quién cuente la hestoria. Antolín Velasco, a quien se debe'l nome de la osa ‘Tola’ –‘Paca’ recibió'l de la muyer de Roberto Hartasánchez, xerente del FAPAS- axustó colos captores de les esbardines, que dempués negaron selo, la entrega de los dos animales. Asina foi como les oses más famoses d'Asturies llegaron a manos del Seprona, con López Rico a la cabeza, y del FAPAS, y d'un cubículu nuna tenada de Tresmonte a Llanes, la primera d'una llarga llista de moraes.

El xuiciu

Sábese bien pocu o nada de la vida anterior de les esbardes al día de la so entrega. El Seprona baraxó, daquella, dos posibilidaes: que la so madre fuera tirotiada por un mineru al atopalu cuando esti diba trabayar o que fora víctima d'una cacería furtiva. Na so piel, recuperada na operación, entá se caltenía'l furacu del disparu y l'estáu de la pelame suxuría que la muerte produxérase non más de dos meses atrás. Pela so parte, Velasco aseguró que la intención de los cazadores yera dar cuenta culinaria de les esbardines cuando calteneles nes sos cases yá entamaba a dar problemes. Sía como fora, estos nunca nun falaron: nel xuiciu aduxeron falta de pruebes, y la sentencia, que llegó nel branu de 1991, foi d'absolución, anque con una multa de trés millones de pesetes por infringir les lleis cinexétiques.

Odisea plantígrada

‘Paca’ y ‘Tola’ nun vivieron siempres n'Asturies. Dempués de pasar una temporada nes cortiles del Fapas de Llanes, fueron treslladaes a una corralada más amplia en Vic, en Cataluña, y, darréu, al Parque Cinexéticu Nacional d'El Hosquillo, en Cuenca. Imposibilitaes yá pa la so reintroducción al mediu selvaxe por tar yá bien avezaes a la interaición col ser humanu, les hermanes, na plenitú de la mocedá, volvieron a Asturies gracies a la Fundación Osu, que proxectó la cortil ente Proaza y Santo Adriano onde morrió ‘Tola’ ventidós años dempués.

Ente medies, tou: el derrumbe de parte de la instalación que-yos fixo mudase temporalmente a Cabárceno; la llegada d'otra osa irrecuperable pal mediu natural, ‘Molinera’, a la corralada en 2013 y tamién el apareamiento con un osu cántabru, ‘Furaco’, que convivió coles hermanes cuando estes yá yeren mayores, anque entá fértiles, y que llegó a montar a ‘Tola’ nuna ventena d'ocasiones. L'únicu esbardu habíu del apareamiento, una cría de pocu más de 300 gramos de pesu, foi atopáu muertu na cama de paya de la so madre en 2013. Va esta selmana trés años que tamién se -y acabó la vida a ella. Tou un símbolu de la hestoria recién d'Asturies.