La primer reproducción del escudu d'armes de Xixón cola figura de Pelayu que se conoz ye abondo posterior al acuerdu conceyil y alcontrábase llabrada en piedra na Puerta la Villa, un monumentu d'estilu clásicu, tamién conocíu pola efixe como l'Arcu l'Infante, llantáu dende lo cabero del sieglu XVIII a la entrada de la ciudá. Enantes hebo otra puerta asitiada nel arenal de la Trinidá, pero les molesties que causaba na ampliación de la dársena aconseyaron el so treslláu de meyores de la villa. De mou que se valtó la vieya y s'alzó la nueva al cabu la cai Corrida o Ancha y Llarga de la Cruz, na redolada de la ciudá, colocándose'l 15 de setiembre de 1782 la primer piedra.
Nos llabores de construcción de la puerta baxo la dirección de Manuel Reguera González, que tamién taba al cargu de les obres de la carretera ente Xixón y Uviéu, hebo delles duldes a la hora de reproducir l'escudu d'armes de la villa cola figura del infante Pelayu nel entepañu del áticu, según costa nun acuerdu conceyil de 16 d'avientu de 1783, nel que se daba noticia de que'l propiu Xovellanos unviera a Reguera González pa la puerta nueva un diseñu del infante Don Pelayu grabao en cera en baxo relieve pa que s'esculpiere como escudu d'armes d'esta villa.
Si quies saber más sobre'l escudu de Xixón, recomendámoste'l llibru de Xuan F. Bas Costales L’escudu d’armes de Xixón. La iconografía de Pelayu
