La Vía Crucis Viviente de L’Infiestu, asitióse como una de les celebraciones más destacaes y orixinales de la Selmana Santa asturiana.
Dende l'añu 2013 , la compañía de teatru piloñesa «Ensin reparu» protagoniza'l famosu Vía Crucis Viviente. Tuvo 6 ediciones que fueron creciendo y ameyorando añu tres d'añu. La edición del añu 2020 tuvo que suspendese por cuenta de la crisis actual del coronavirus.
Componse de trescientos figurantes, qu'inclúin actores, músicos y figurantes. Les actuaciones siempres tán acompañaes de l'asociación musical piloñesa «de la Fuente«, encargaos de poner banda sonora a esti eventu. Nes últimes ediciones aumentó considerablemente'l númberu de figurantes yá que numberoses persones del conceyu interesáronse en participar. Amás, el párrocu de L’Infiestu, un de los impulsores de la Vía Crucis, cuenta n'El Comerciu qu'un ampliu grupu de Madrid tán interesaos en participar viviegamente nes representaciones.
Destaca'l decoráu de los escenarios y el vestuariu que lleven los figurantes yá que son bien realistes. Por esti motivu, cada añu esponen estos traxes na Casa de Cultura Marqués de Vistalegre» xuntu con numberoses fotografíes realizaes por fotógrafos profesionales de la zona.
La Vía Crucis represéntase durante dellos díes y en distintos escenarios de la capital piloñesa, coincidiendo colos díes y acontecimientos más importantes de la Selmana Santa. Dalgunos de los fechos que se representen son La Última Cena, La oración de Jesús nel güertu de los Olivos o la muerte de Jesús.
Los organizadores d'esti eventu amuésense bien contentos pola acoyida que tuvo mientres los últimos años esta representación que cada vez cunta con mayor arribación de públicu y reconocencia. Esperamos que'l próximu añu'l COVID dexe que podamos volver esfrutar d'esti espectáculu con munches mas ganes si quepe.
