En bien pocu tiempu, va llegar la Nueche d'ánimes, una fecha bien singular y que, anque paeza bien alloñada de nós y venceyada a los Estaos Xuníos y el so halloween, esta fiesta tien el so orixe nos pueblos del arcu atlánticu. Ye por eso polo que güei vos traemos dalgunes de les tradiciones qu'hai o había n'Asturies por cuenta d'esta celebración.
La mar que devuelve a los muertos
Nos pueblos pesqueros de la mariña asturiana, dalgunos tan conocíos como Cuideiru o Llastres, los pescadores decidíen pasar esa nueche en casa, argumentando qu'una lleenda dicía que les redes arrastraríen güesos de les persones que morrieren na mar. Investigadores como Aurelio del Llano recueyen d'esta manera otres cuestiones que-yos asocedió a dellos pescadores na Concha de Artéu, una sablera de la parroquia de Samartín de Lluiña, nel conceyu de Cuideiru:
«D'antiguo los pescadores de Cuideiru nun salíen a la mar la nueche de tolos Santos nin la del día de la Encarnación. Pero una vegada, la nueche de tolos Santos, salieron dos llanches a la pesca y al pasar frente a la Concha de Artéu, vieron que, sobre l'agua, casina oriella, amburaben munches lluces. Los marineros encarreraron les proes de les sos llanches escontra aquelles lluminaries y rema que rema, porque ellí les foles rompíen con muncha fuerza, llegaron allá y vieron llenos de mieu, que les lluces yeren producíes por güesos que punxera ellí la Güestia».
La Güestia
Precisamente, la Güestia ye otra de les tradiciones» de la Nueche d'Ánimes. Tamién conocida como Huóstica, ente los vaqueiros d’alzada consiste nun grupu d'espíritos de xente finada que caminen en procesión, supuestamente, pa consiguir l'auxiliu o la lliberación de les sos almes atrapaes y algamar l'eternu descansu, n'ocasiones, esixendo'l cumplimientu de ciertes promeses con cuenta de lliberar o la expiación de dalguna falta nel mesmu llugar nel qu'esta foi cometida. La Güestia suel tar formada por un grupu ocho ánimes que caminen en grupos d'a dos, con un líder que lu encabeza y que sal de los cementerios en busca de mortales que sumar al so conxuntu caminando o xubíes nel denomináu Carru de la muerte.
L’Aguinaldu
Mesmo que nel tradicional antroxu asturianu o en Navidá, la reciella de la casa salíen a pidir (ensin disfraz, non como n'antroxu) embadurnaos en ceniza, pidiendo un pagu tres cantar. Esti pagu solía consistir en dalgún frutu secu o embutíu.
