María Esther García López (Valdés, 1948), ye una poeta y escritora n’asturianu y castellan, anguaño ye presidenta de l’Asociación d’Escritores d’Asturies. Llicenciada en Pedagoxía, Maestra, y Esperta en Filoloxía Asturiana, ye miembru de l’Academia de la Llingua Asturiana. Foi profesora na Universidá Asturiana de Branu (UABRA) a lo llargo de 25 años y participó como xuráu en bien de concursos lliterarios y recitales de poesía. Tien una estensa obra didáctica, d’ensayu, investigación y collaboraciones en periódicos y revistes. Amás tien nel so haber numberosos galardones gracies a el so llabor y trayectoria.
Un llugar pa perdese una fin de selmana…
En Belén de Valdés, onde se pue facer nueche nel albergue (agora zarráu, pola mor del andanciu), y a pocos Km, pasáu l’altu del Sagredal, nel Altu d’Oneta ta l’hotel Albeitar (agroturismu cultural). Una zona pa desconectar y onde’l tiempu dura más.
Un llugar pa vivir…
Piedrasblancas, que ye onde vivo dende hai 39 años. Sicasí soi culu de mal asiento, y si nun fuera que les circunstancies m’aten a esti llugar, caleyaría pel mundu alantre y viviría n’otros sitios que, de xuru, me prestaríen tamién.
Un platu… Papes con mantega y miel. Nun hai manxar más grande.
Un postre…arroz con lleche, receta de mio madre..
Una playa pa pasar el día…
La de L.luarca (Valdés). O la de Salinas en Castrillón.
Un pueblín que nun podemos dexar de ver…
Belén de Valdés, onde fui a la escuela, onde lo pasé tan bien, onde me bauticé, me casé, (bien casada) y en fin, onde tengo munchos recuerdos.
Un chigre pa tomar unos culinos…
El Yantar de Toni, n’Arnáu. Porque inda conserva esi sabor de chigre d’antaño. Ellí la sidra ta perbono y otres coses tamién.
Un parque natural pa visitar:
Parque Natural de Somiedo, declaráu Reserva de la Biosfera nel añu 2000. Ellí paezme tar al otru llau del mundu. Entornu guapísimu.
Una fiesta a la que nun faltar…
A la fiesta de Belén (Valdés), el primer domingu d’ochobre. Inda guarda dalgo de tradicional, varies xeneraciones disfrutamos de la comida tradicional, toos xuntos, llega xente de munchos llaos y destaco’l cantar del ramu, cantáu n’asturianu, recuperáu hai unos años. Perguapo too.
Un muséu pa recomendar…
El muséu etnográficu de Grandas de Salime, onde se vuelve p’atrás nel tiempu y ye mui emocionante.
Un momentu de la hestoria d’Asturies que te prestaría vivir…
Cuando l’asturianu seya llingua oficial. Esi día, esi día nun voi deitame en tola nueche. Va paeceme que toi suañando espierta, dempués de tantos años de trabayar por ello.
Un baille pa pasalo bien…
Les dancites, anque dan munchu tiru. Bailléles munches veces cuando yera moza no salón de Belén, y estos años en dalgunes fiestes de pareya col mio amigu Balbino que baillaba hasta hai poco nel grupu La Corte. Agora baillo l’agarrao, que se me da bien.
Sala de fiestes Gelther, en Castrillón, con baille y cenes tolos sábados y domingos (agora pesllada a causa del andanciu). Una sala de les poques que queden de les d’antaño, con música en direutu y ambiente prestoso.
Una pallabra n’asturianu que te preste…
“Barredoiru”, más porque nun alcuentro una pallabra exauta pa traducilo al asturianu. Y porque yo soi un barredoiru.
Una tradición que nun pue perdese…
Les comíes nos praos cuando les romeríes, colos platos tradicionales: tortiella, empanada, chorizos, llacón, frixuelos, arroz con lleche y d’entrante, mantega con miel, como poníemos siempre na mio casa de La Degol.lada.
Una espresión n’asturianu que te preste…
“Dir de sopas”. Demientres la infancia y la mocedá, díbemos de sopes (convidaos) a les fiestes, a casa los mios güelos maternos y otros familiares y amistaes. Estos momentos tan dulces téngolos archivaos nel posu la memoria.
