Mio güela, una sección na que diverses persones falen de les sos güeles.

Mio güela llamábase Ana, Anita pa la mayoría de la xente, Annie pa la so meyor amiga, Nitina pal mio güelu y güelita Nita pa nós. Nació nel añu 31 y quiciabes eso definió’l so calter de dalguna forma. Yera republicana y roxa como ella sola. Feminista ensin sabelo y creía en dios a la so manera.


Nun llegó a conocer al so padre, so madre (mio bisgüela) al enviudar tuvo que trabayar d’interna, asina qu’ella crióse cola so güela.


Vivió los horrores de la Guerra siendo una neña, pos tuvo que ver a tíos na cárcel enantes
de que los fusilaren o ser testigu de cómo la Guardia Civil llevara a la so güela a ser torturada pa que confesara ónde taben los fíos, fugaos nel monte.


Enterró a un fíu de sólo 23 años víctima d’un cáncer, pero entá asina sacó fuercia xunto con mio güelu pa críar al mio padre, qu’entós tenía 3 años. Y llueu pa facelu tirar p’alantre cuando él tuvo la mesma enfermedá que’l so hermanu.


Enxamás permitió que naide torgara la so llibertá, humildára-y o faltára-y al respetu. Tenía
un calter arrollador. Tan brava yera y tantu remangu tenía qu’una vegada, pegó-y un fesoriazu na cabeza a un vecín por faltar y facer llorar a la so madre.


Foi una llectora incansable, siempres la recuerdo con un llibru. Inculcóme l’amor pola
llectura y, cuantimás, pola poesía. Tamién yera coqueta y presumida, gustába-y dir siempre
maquillada, arumada y bien peñada. Y atrevida, pos cercana a los 70 decidió viaxar sola a Arxentina y Chile pa realcontrase cola familia que s’exiliara.


Pa min ye un examplu de muyer lluchadora, independiente y valiente. Y a min préstame pensar que de dalguna manera parézcome a ella.