L’Infiestu (1970). Enrique Carballeira Melendi ye periodista y escritor. Ye autor de varios llibros pa rapacinos, de los qu’elli mesmu ye l’ilustrador: El cuélebre y l’home del espaciu (1991), El príncipe medranosu (1992), El gaiteru de Sotu (1993) y Les aventures de Xaime Bon, detective galácticu (1995), Tres hestories de Ñublina más una de propina (1996) y El casu de los centollos xigantes y Les aventures de Pillu . Tien escrito tamién relatos p’adultos. Colaborador habitual de la cadena radiofónica Onda Cero, del diariu xixonés El Comercio y del semanariu en llingua asturiana Les Noticies.

Un llugar pa perdese una fin de selmana…

Una viesca guapa de les munches que tenemos per Asturies. Como ye lo que más controlo, yo diría que dalguna del oriente d’Asturies. La viesca alredor del área recreativa de La Pesanca o les munches rutes qu’atraviesen esa zona… Xubiendo en direición al picu Vízcares, por exemplu. Na zona tampoco falten bones cases rurales y hotelinos pa quedase. Y también bonos llugares pa comer bien.

Un llugar pa vivir…

Equí nun voi ser orixinal. Tola vida llevo viviendo en L’Infiestu, en Piloña. Equí ta tol mio universu asina que nun imaxino otru llugar meyor. Creo que nun echo nada a faltar. Bona xente, bon paisaxe, tranquilidá, ambiente sanu y grandes fiestes. Y hasta un montón de pantasmes bonos, de los que te faen compaña cuando t’alcuentres solu.

Un platu…

¿Ún namás? Voi dicir unos pocos, meyor. La Fabada, el pote, los garbanzos con llagostín, ¡tortos con picadiellu, empanada de cecina y quesu cabra! Y too fecho pola meyor cocinera que conozo: mio madre, claro.

Un postre…

La tarta d’ablanes de mio madre o la tarta castañes de la mio muyer; la de turrón de mio tía, o la de mazana que fice yo dalguna vez (poques) y que milagrosamente quedó perbona. Lo de los postres piérdeme, la verdá. Soi mui llambión y les tartes son un viciu. Tamién tolo que tenga que ver col chocolate.

Una playa pa pasar el día…

Pues equí van volver los pantasmes (bonos) del pasáu. Va munchos años que nun voi per ellí, dende neñu en realidá, pero pasé munchos y mui bonos díes na playa de Villahormes, en Llanes. Tamién me presta un montón la playa de La Franca. Bonos llugares pa relaxase y descansar. Sobre too con poca xente.

Un pueblín que nun podemos dexar de ver…

Creo qu’otra vez nun voi ser orixinal porque ye ún de los pueblos más visitaos del oriente y creo que d’Asturies: Espinaréu. Pero, popularidá turística aparte, esta ye la tierra de nos. L’orixe y centru del universu particular d’esti que fala. Creo que nun hai llibru y cuentu que yo escribiera, nin dibuxu que fixera nestos años, que nun tuviera relación, consciente o inconsciente, con esti llugar de Piloña. 

Un chigre pa tomar unos culinos…

Pues, quedamos mesmamente en L’Infiestu en cualesquier barín de la cai El Quesu, onde hai mui bon ambiente los veranos y cuasi tol añu. Agora ta la cosa más complicada pol andanciu esti, pero esperemos que más pronto que tarde, se pueda volver a disfrutar ensin tantos problemes. Y mirando fuera d’Asturies, pues munchos de Portugal, país perguapu y con una gran hostelería. Recuerdo con munchu gustu una comida mui especial nuna terraza d’una cai d’eses estrechines de Sintra, xunto a Lisboa.

Un parque natural pa visitar…

El parque de Redes ye un sitiu preciosu. Pura Asturies, con eses viesques, ríos y montes. Una obra d’arte tol añu, pero especialmente na seronda. Y tamién lo tengo al llau de casa. La verdá ye que n’Asturies ye perdifícil nun atopar un requexu pa suañar y pa vivir. Qu’estes tierres formen parte de la «España vacía» diz munchu de lo perdía que ta la raza humana. Pero, en fin… más pa nosotros.

Una fiesta a la que nun faltar…

El Festival de L’Ablana de L’Infiestu ye una fiesta mui guapa y mui tradicional. Préstame pol ambiente, porque la llevo viviendo tola vida y porque ñació pa promocionar y festexar un frutu que llevamos mui dientro en Piloña. Tamién ye mui importante y una celebración bien orixinal la Fiesta del Asturcón, na mayada d’Espineres nel Sueve. Y otra mui piquiñina pero que ta enllena d’amor y cariñu: la Romería de l’asociacion protectora Animales de Oriente, en La Cueva, tamién en L’Infiestu.

Un muséu pa recomendar…

Pues mira, tamién en L’Infiestu tenemos ‘La Casa’l Tiempu’, el muséu del Reló, un equipamientu pocu conocíu, tovía, pero que tien unos tesoros impresionantes, difíciles d’atopar, con miles de reloxes, ferramientes y documentación. 

Un momentu de la hestoria d’Asturies que te prestaría vivir…

Bono, si fuera namás que pa un día, prestaríame asomame per una ventana temporal-dimensional a ún d’esos díes de primavera o entamu de veranu, cuando los neandertales del Sidrón, s’asoleyaben na parte fuera la cueva, quiciabes preparando dalguna ferramienta o cenciellamente descansando. Tenía que ser una vida mui dura, pero de xuru que tamién había momentos de felicidá y de paz. Si Asturies ye guapa agora, imaxinái n’aquella dómina.

Un baille pa pasalo bien…

Buf… Equí si que me lo pones difícil. Nesti casu creo que nun soi nada tradicional, asina que me pido dalgo pop-rock ochenteru…

Una pallabra n’asturianu que te preste…

Llambionada

Una tradición que nun pue perdese…

Toles que tienen que ver coles llabores del campu y la vida rural asturiana, especialmente les relacionaes cola recoyida de les colleches y los frutos. Magüestos, mesar y esbillar, la sidre casero, la esfoyaza…

Una espresión n’asturianu que te preste…

Yá tamos cagando fuera la pota…