Fe Santoveña nació en Vibañu, Llanes el 1963. Estudió Hestoria na Universidá d’Uviéu y tiempu dempués, licenciose en Antropoloxía Social y Cultural na UNED. Fizo su tesis doctoral na Univesidá d’Uviéu, con un trabayu sobre la moda popular y el traxe asturianu como elementu de la nuesa identidá. Tien dellos llibros y artículos espublizaos al rodiu d’esti tema y d’otros averaos a la cultura tradicional asturiana. Anguaño trabaya como profesora de Hestoria nel IES Pérez de Ayala d’Uviéu y ye investigadora na Escuela Internacional de Doctorau de la UNED.
Un llugar pa perdese una fin de selmana…
El conceyu d’Ibias, enteru. La serenidá del llugar y de la so bona xente.
Un llugar pa vivir…
Dos. La ciudá d’Uviéu, na que soy feliz y Llanes, el llugarín onde nací.
Un platu…
Pote de h.abas, berzas y pataques, con buen compangu y que nun falte un patruque como lo h.acemos pa Llanes.
Una playa pa pasar el día…
Torimbia. (Nun salgo del conceyu Llanes)
Un pueblín que nun podemos dexar de ver…
San Xuan de Beleño.
Un chigre pa tomar unos culinos…
Nun soi sidrera. Meyor una cervecina fría. Ya me cerraren el Ca Beleño y La Calleja La Ciega, pero quédame el Mare Nostrum, n’Uviéu.
Un parque natural pa visitar…
Parque de La Mesa-Las Ubiñas. Parte d’aquella «línea Maginot» asturiana.
Una fiesta a la que nun faltar…
La Magdalena en Llanes y más íntima, San Pedru en Vibañu.
Un muséu pa recomendar…
El Muséu del Pueblu d’Asturies en Xixón. Pa ver y pa entender. Ya si queda tiempu, el Bellas Artes n’Uviéu pa esfrutalu.
Un momentu de la hestoria d’Asturies que te prestaría vivir…
La muerte de Fruela, con tolo que hubiera enantes y tolo que pasó dempués.
Un baille pa pasalo bien…
Pa pasalo bien… una jotina de cualesquier llau d’Asturies. Pu llucime, el Pericote.
Una pallabra n’asturianu que te preste…
Moruxa.
Una tradición que nun pue perdese…
Les ofrendes de ramos, bien cantaes y bien tocaes. Y las h.ogueras, por supuestu.
Una espresión n’asturianu que te preste…
Dami tira. Non h.allo meyor palabra pa la solidaridá.
