El Domingu de Sidros y Comedies celébrase’l primer domingu dempués de la festividá de Reis na parroquia de Valdesoto, nel conceyu Siero. Esti añu l’andanciu de covid19 y el cutu pol temporal dificultaben la posibilidá de celebralu con públicu, pero la traidición siguió alantre emitiéndose en TPA.

La de los sidros ye una de les primeres mazcaraes d’iviernu del norte de la península. Estes manifestaciones culturales que se celebren nun periodu comprendíu ente’l Nadal y l’Antroxu.

L’orixe d’esta tradición pagana piérdese na nueche de los tiempos. Los Sidros tamién reciben el nome de «guirriu». Sobro l’orixe del nome hai delles teoríes. Según Constantíno Cabal, unu de los mayores estudiosos de la cultura y folclor d’Asturies, la pallabra «guirriu» procede del llatín guerrire (saltar de gozu, retozar). El folclorista y lliteratu en llingua asturiana, Fausto Vigil, dicía que la so procedencia yera del euskera oguerria, que significa Nadal. Pa la pallabra «sidru» búscase una salida fácil, y hai quien diz que se llamen asina pola so rellación cola sidra.

El sidru procede, según la teoría del hestoriador uvieín Juan Uría Ríu, de los ritos de los pueblos primitivos, «onde los miembros del clan buscaben bien la protección del animal totémicu, antroxando coles sos pieles, o la fecundidá de les persones». Asina lo reflexen Rosa María Villa, Javier Díaz y Gregorio Fonseca nel so estudiu sobre les costumes y tradiciones de Siero espublizáu en «El libro de Siero». Estos autores, que participen parcialmente de la teoría d’Uría Ríu, consideren a los sidros» como «perantigües mázcares totémiques, emparentables o reencarnables n’otres que s’usaben nos ritos griegos y romanos de Fauno y Silvano y del Busgosu».

Y añeden: «tenemos de consideralos como símbolos d’antiguos ritos parateatrales que se celebren pa festexar el pasu del iviernu a la primavera». Y asina, dende va milenios, llegaron a los nuesos díes.

Los Sidros -suelen ser cuatro- son los personaxes que más llamen l’atención de los Sidros y Comedies. Visten de blancu, con polaines de cueru y una faxa colorada. Lleven una mázcara de piel d’oveya en forma de cucuruchu que termina con un rau de raposu.

Na cintura lleven un cintu con cencerros o llueques que sirven p’avisar de la llegada de la comedia. A lo último, lleven unes vares d’ablanu nes que s’apoyen pa dar blincos. Dizse que’l meyor sidru ye el que más blinca.

La comedia ye una pequeña representación teatral que trata distintos temes d’actualidá del pueblu, d’Asturies o del restu del mundu. Les representaciones suelen facese nel Campu de la Ilesia, al rematar la misa, anque esti añu tuvieron de facese a techu y ensin públicu.

Los personaxes polos que ta formada son: el vieyu y la vieya, dos dames, dos galanes, dos tontos, el ciegu y el criáu y el pecáu.

Dientro de les comedies, estrémense delles dómines. De la primera desconozse’l so entamu, pero hai constancia de que llega hasta finales del sieglu XIX. Nella representen obres d’autores anónimos, de calter popular y tradicional, y tresmitíes oralmente de padres a fíos, de xeneración en xeneración.

La segunda dómina -dende finales del sieglu XIX hasta 1936- representáronse obres d’autor, principalmente de José Noval «Siero», con unos personaxes que pueden considerase fixos y unes representaciones con planteamientos asemeyaos. La llegada de la Guerra Civil y la posterior prohibición de los antroxos fueron los culpables de la desapaición d’estes manifestaciones culturales.

La tercer dómina qu’empieza a mediaos de los años cincuenta del sieglu pasáu y llega hasta 1991 fueron dellos intentos de distintos autores como Luís Rodríguez «Asaura» o Nieves Noval, que pretendieron la so recuperación en distintos períodos, pero siempres con un ésitu relativu porque s’estendíen en curtios espacios de tiempu. La Ilesia tuvo gran importancia pala recuperación de la tracición, gracies al cura de la parroquia d’Areñes que pidió a Luís Rodríguez «Asaura», gran conocedor de los rellabicos de les Comedies, que realizara una comedia pa representala en feches próximes al Nadal. D’esta forma, una vegada más recuperábase per pocos años esta tradición. Darréu un grupu de mozos de La Rasa propunxeron recuperala de nuevu y pa ello cuntaron cola collaboración inestimable, una vegada más, d'»Asaura» que mientres dellos años foi’l nexu d’unión pa que nun se perdiera la Fiesta.

Naquella dómina, los sidros de más sonadía en Siero yeren los d’Areñes y La Rasa (Carbayín) y Valdesoto. Sabemos qu’estos grupos representaron los sos comedies en Feleches, Bimenes, La Pola, etc. llegando inclusive hasta Lada, Barro, Tiuya, La Güeria Carrocera, Bimenes o Vega (Sariegu).

Na actualidá, les comedies tán escrites pol autor y director de teatru costumista José Ramón Oliva. Sicasí, la tradición de los Sidros y les Comedies apunta a caltenese viva nel tiempu gracies a los escolinos de Fayes, que nos últimos años tán representando les comedies de Manuel Pergentino Martínez.

En Valdesoto axúntense cada Domingu de Sidros y Comedies más d’un centenar de persones pa ver esta mazcarada recuperada nel añu 2004.

En 2019 declaróse a los Sidros y Comedies Bien d’Interés Cultural de carácter inmaterial. Pablo Canal, de l’Asociación «El Cencerru», qu’organiza estes celebraciones, esplicó entós: «La tradición de Sidros y Comedies ye una manifestación cultural que apaez y desapaez con con demasiada frecuencia. El reconocimientu de BIC, supón un nivel de protección que si por desgracia volvieren a desapaecer (que de xuru nun va pasar), taría cubiertu. Amás hai que tener en cuenta qu’esti ye’l primer pasu pa les mazcaraes nel país».

«Pensamos que ye bono, non solo pa la nuesa tradición, sinón tamién pal restu de mazcaraes, que podrán solicitar el BIC y tendrán el camín entamáu. Amás, va servir de revulsivu y de xuru que otres munches mazcaraes que tán dormíes n’Asturies van volver ver la lluz».

Semeyes: El Cencerru