El Trasiegu Fest yá ta en marcha con delles meses redondes y talleres sidreros repartíos polos conceyos de Cabranes, Bimenes, Colunga y Sariegu. Sicasí, nun fixo más qu’entamar y, esta fin de semana, espérase bien de públicu en Santolaya de Cabranes, llugar escoyíu pola organización pa la celebración de conciertos, concursos, recitales ya inclusive’l pregón, que va dar Luis Benito García Álvarez, director de la Cátedra de la Sidra de la Universidá d’Uviéu.

A toles actividaes culturales, conciertos y nueche en mayanza, va acompaña-yos un mercáu artesanu y gastronómicu, onde van asitiase más de 40 puestos a lo llargo de tola tarde del vienres y tola xornada del sábadu. Un mercáu que siempre tará nel puntu de mira, yá que na so localización van tar siempre desendolcándose actividaes del Trasiegu Fest.

El gran eventu del festival van ser los conciertos. Per una parte, la nueche del vienres 22 va ser el tiempu del grupu folklóricu Trebeyu, que va entamar una nueche en mayanza na plaza del conceyu de Santolaya de Cabranes. Per otra parte, la nueche del sábadu va ser musical. A partir de les 18:30 y hasta les 02:00 de la madrugada Luis Nuñez y Los Folganzanes, Algaire, La Tarrancha y Llevólu’l Sumiciu van poner a baillar a tolos presentes. A lo último, la mañana del domingu va tar dedicada a la reciella. A les 12:00 hores ye’l momentu de Mestura, mientres qu’a les 13:00 hores David Varela va dar un conciertu didácticu familiar na Casa de Cultura de Santuyano, nel conceyu Bimenes.

El Trasiegu Fest ye un proyectu que naz col envís d’amosar la bayura de la cultura sidrera n’Asturies. Pa ello, tando na sociedad d’anguaño, ye importante facelo al traviés d’un formatu modernu y que llegue al públicu. Poro, tamién ye bien importante sacar la cultura sidrera de los sos llugares habituales y treslladala a llugares populares y onde’l gran públicu pueda averase. Sicasí, caltener les ubicaciones ye esencial pal desenvolvimientu de l’actividá. Esti festival, va desenvolvese nos conceyos de Sariegu, Bimenes, Colunga y Cabranes, toos ellos enmarcaos dientro de la Mancomunidá Comarca de la Sidra, na postrer selmana del mes de setiembre. Entama VerAsturies y Cuatro Gotes Producciones cola colaboración de los conceyos de Bimenes, Cabranes, Colunga y Sariegu, amás del sofitu del Plan de Recuperación, Tresformación y Resiliencia.