Poques figures trescendieron más nel conceyu de Ḷḷena que la del poeta y dramaturgu Nel Amaro. Siguidor d’artistes como’l catalán Joan Brossa o’l murcianu Valcárcel Medina, fíxose un güecu importante nel mundu de la lliteratura d’Asturies, destacando como una figura peresencial dientro del Surdimientu, sobre manera gracies al teatru. Obres como Xénesis, Alborá de la conciencia o Antagonía, por casu, valiéron-y bien d’afalagos y la so escritura dellos y valiosos gallardones. Anque la verdadera marca inconfundible d’esti artista diba tar ensin dulda nes sos performances y poesía visual, de la qu’él foi introductor n’Asturies nos años 90. La poesía visual que los más analistes afirmen qu’amuesa un raigañu de compromisu col so entornu, sobre manera col convulsu obrerismu de signu proletariu, al qu’enxamás llegó a dar el llombu, y que claramente siempre tuvo en mente pa les sos reiteraes acciones mesmo artístiques que reivindicatives. Acciones que tamién-y valieron un reconocimientu más lloñe de les nueses fronteres asturianes, llegando a tar incluyíu na antoloxía de poesía visual d’España.

La so muerte nel añu 2011, con namái que 64 años por mor d’una complicación de la diabetes que padecía, dexó güerfanu al mundu del arte y la cultura n’Asturies, especialmente al conceyu de Ḷḷena. Na so alcordanza, y pa nun perder el camín que dexare (y qu’otros artistes como Cuco Suárez o Ánxel Nava siguen entá percorriendo), lleva yá dellos años fomentandose la figura, obra y heriedu del controvertíu artista mierense. Ensin escaecer, claro ta, que gracies a ello promuévese tou tipu d’investigaciones y alcuentros de calter cultural. Nel Amaro inspiró a la hora de crear tres de sí espacios llibres de tabús y vergoñes onde namás cabe l’amor pola espresión artística ensin llende. Prueba d’ello la montonera d’alcuentros d’arte d’acción y de poesía que lleven realizándose en Ḷḷena.

Un d’estos alcuentros programáu pa esti branu 2022, ente’l 16 y 30 de xunu, ye’l XVII alcuentru d’arte d’acción que’l Conceyu de Ḷḷena ta preparando y que promete ser un festival al altor de los XVI anteriores alcuentros qu’entamaren n’años anteriores, sobre los que se va facer una esposición. Y ye que nel alcuentru previu a la llegada d’artistes residentes colos vecinos, va acompaña-y una proyección de semeyes d’alcuentros anteriores, xunto con un prestosu pinchéu y dalgo de música pa un bon primer contactu. Ente algunos de los artistes confirmaos van tar el valencianu Bartolomé Ferrando, o la francesa Eleonor Ozane. Nesti espaciu va haber llugar tamién pa la reciella, que van disponer de talleres ente’l 13 y el 17 de xunu con artistes como Ánxel Nava, Roxe Crespo y Bartolome Ferrando. 

Los alcuentros incluyen la presentación del llibru «Salto al Vacio» Los Alcuentros en Ḷḷena 1995- 2021″ el xueves 23 de xunu onde s’ilustra la hestoria d’estos alcuentros dende los anicios, con Nel Amaro a la cabeza, hasta l’añu pasáu y l’impactu na sociedá y la cultura del conceyu de Ḷḷena, concienciáu dende’l principiu cola so forma d’arte a la que siempres mostró sofitu. Va ser una presentación con antifaces y pieces sonores clásiques y de Nel Amaro interpretaes por Abel Loureda y Nieves Correa (cuntando tamién con dalguna grabación cola voz de Nel Amaro). Darréu va falase de cómo s’articuló la publicación, amás d’un pinchéu distendíu nel que charrar y compartir esperiencies.

Tres la presentación y el pinchéu, va realizase lo que se conoz como una “revista caminada”. Un proyectu que consiste nun percorríu pelos barrios de Ḷḷena y onde les páxines de la revista son les acciones que se lleven a cabu nes zones (requexos, places, portales, etc) que previamente se tengan determinaos. Un proyectu que s’avera a la manera de trabayar que tenía Nel Amaro y que va da-y a los participantes una oportunidá especial de facer y plasmar el so propiu arte.

Los resultaos de los distintos talleres, performances y proyectos que van realizase nos alcuentros van presentase’l 25 de xunu. D’esta manera tolos participantes, amás de xente que tenga interés por velo, van poder contemplar el resultáu de les selmanes del prestosu trabayu artísticu que ficieren en collaboración col restu de participantes y l’ayuda de los artistes convidaos.

Asina, otru añu más, Ḷḷena amuesa’l so fuerte sofitu a la cultura y a un arte que, anque quiciás menos convencional, nun dexa de llamar l’atención y robar pa siempres el corazón de quien lu aprecia dafechu como lo facía Nel Amaro. Un arte poco convencional que lleva años dexando buelga nes cais de Ḷḷena.