L’exemplar bien paga la pena de facer una visita a Quirós y conocer el guapu pueblu y espaciu natual nel que s’asitia

El texu ye un árbol que n’Asturies tien un significáu especial y que vien tando venceyáu a lo sagrao y a lo espiritual dende va miles d’años. Nun ye raro por ello que, cuando se quixo imponer el cristianismu nel país, la Ilesia usara los espacios xunto a los texos pa establecer los templos cristianos, aprovechando los vezos y les creencies heredaes de los ástures. Hai munchos texos n’Asturies, pero dellos son bien especiales, pola so llocalización, pola so antigüedá o por otres característiques. Ye’l casu del Texu de Bermiego, que xunta delles d’estes cuestiones. Asitiáu nel pueblu de Bermiego, nel conceyu de Quirós, esti texu tien un tamañu y una llocalización que lu faen mui especial.

Llantáu na fastera occidental del cordal del Aramo, ta na rodiada del pueblu y dientro de la cortil de la ilesia. Pa llegar a velu ye necesario percorrer primero los caminos del pueblu de Bermiego, ente les cases y horros d’esta aldea qu’anguaño tien una importante actividá turística.  El Texu de Bermiego foi declaráu monumentu natural el 27 d’abril de 1995, polo que ta protexíu ya incluyíu nel Plan de Recursos Naturales d’Asturies​. La so eda ye desconocida pola falta d’estudios, pero calcúlase que supera los mil años. La so morfoloxía ye cuasi perfecta, con una copa que mide 15 metros, 10 metros d’altor y un tueru que tien ente 6,5 y 7 metros de perímetru, que lu convierten nunu de los exemplares mas impresionantes que pueden atopase n’Asturies.

Bermiego
Vista del pueblu de Bermiego.