Vicente García Oliva (Xixón, 1944), autor de referencia n’Asturies, foi profesor mercantil y ye miembru de númberu de l’Academia de la Llingua Asturiana. Los sos empiezos nel mundu lliterariu tán venceyaos a los concursos de cuentos curtios de Conceyu Bable y tien una ventena de llibros publicaos n’asturianu y castellán nos que cultiva tantu la lliteratura xuvenil como la novela policiaca o l’ensayu. Foi reconocíu con numberosos premios ente los que podemos destacar: el Máximu Fuertes Acevedo d’Ensayu, María Josefa Canellada, el de Llectures pa rapazos de l’Academia de la Llingua Asturiana, o’l de la Crítica d’Asturies, ente otros.
Llugar pa perdese fin de selmana: Villaviciosa.
Pa vivir: Xixón.
Platu: Ventrisca de bonitu al fornu.
Postre: Tatín de mazana.
Playa pa pasar el día: Bañugues.
Pueblín que nun hai que dexar de ver: San Xuan de Beleño.
Chigre pa tomar unos culinos: Casa Tino, en Xixón.
Parque Natural: Redes.
Fiesta: La foguera de San Xuan na mio casina de Pión.
Muséu: L’Arqueolóxicu.
Momentu de la Historia: Asistir como embaxador del Reinu d’Asturies a la Corte de Carlomagno.
Un baille pa pásalo bien: La Danza Prima.
Pallabra que te presta: Señaldá.
Una tradición que nun pue perdese: La tresmisión xeneracional de la llingua.
Una espresión n’asturianu que me presta: “Como te conocí ciruelu nun me causes devoción.”
