Pilar Sánchez Vicente nació en Xixón nel añu 1961. Estudió Xeografía y Hestoria na Universidá d’Uviéu y trabayó como hestoriadora, documentalista y escritora. Ente les sos obres atopamos La diosa contra Roma, Luciérnagas en la Memoria o El fantásticu viaxe de Selene. Ta acabante poner nel mercáu la novela «La muerte es mía».

Un llugar pa perdese una fin de selmana: Pa perdese y non atopase yo diría a Ponga y nun fai falta que seya pol Aguilandu, pa ver al guirria. En Beleño tengo de salir al vermú y volver al día siguiente, rite tu del late vermú de los hípsters. Y si llogres salir del chigre puedes perdete pela viesca Peloñu, dir a tocar el cielu dende dalguna cumal o dir a Llué tres los pasos de Martinón.

Un llugar pa vivir: El que vivo, ensin dir más lloñe. El Natahoyo foi’l primer barriu obreru de Xixón y foi escenariu de les lluches de la Naval. Agora hai un movimientu vecinal de recuperación alredor de Les Naves, pidimos la salida al monte Coroña y la recuperación de la fachada marítima. Yo siempres dixi que teníemos que facer la XANA, Xuntanza d’Artistes del Natahoyo, nun das créitu cuántos vivimos nestes cais: Pedro Timón, Dani Prendes, Laura Sandoval, Ramón Lluis Bande, Tito Montero, Alberto Rodríguez, Félix Corcuera, Vanessa Rodríguez, David Varela, Miren Manterola, Eusebio Llorca… y quédenme un montón nel tinteru. Somos el Soho de Xixón: pintores, escritores, cineastes, actores, músicos… ¡¡y nun nos damos importancia!!

Un platu: Na base la pirámide tán el pote y los callos coles trés P: picadinos, pegañosos y picantinos. Nel segundu escalón, les cebolles rellenes. Los calamarinos de potera son un viciu, pero más tovía los oricios. Per encima tan la llobina y la ventrisca a la plancha y, nel olimpu, les andariques, la ñocla y el bugre. O un pelonín del Cantábricu. ¿Un platu, decíes? Uno solu nun puedo que me fixo la boca un fraile…

Un postre: Mira, esta ye más fácil: Frixuelos con llambionaes. Y chicolate, munchu chicolate.

Una playa pa pasar el día: Poniente ye la mio playa d’usu diariu, onde voi pasiar pa refrescar la cabeza cuando m’arde d’escribir.  Yo prefiriera que mantuviera’l nome d’Arenal del Paséu, como se llamaba nel sieglu XVIII o Playa del Natahoyo, yá nel XIX. Ehí taba la playa de Pando, onde veníen a baños la reina Sabel II y dempués la fía, la Chata, hermana d’Alfonsu XII y tuvo casetes enantes que San Llorienzo. ¡Que se sepa!

Un pueblín que nun podemos dexar de ver: San Esteban los Buitres y Banduxu son dos sitios que te retrotraen al pasáu y onde  puedes sentite na Edá Media. La grandeza de la nuesa insignificancia ye lo que t’abluca nesos llugares.

Un chigre pa tomar unos culinos: La plaza del Requexu en Mieres ye más qu’una sidrería, siempres me prestó «torear» nesa plaza y dir de parroquia en parroquia.

Un parque natural pa visitar: Somiedu tienlo too, ye una xoya de la ñatura. Tien etnografía, paisaxe, fauna… Combina’l paisaxe alpinu, la guapura de los llagos y cumes nevaes, los teitos y la llucha emblemática pola recuperación del osu pardu.

Una fiesta a la que nun faltar: ¡Colo que yo fui! Agora yá toi aturrida de fiestes, teo’l cupu cubiertu de puxarra, forgaxa y baruyu. Por embargu, tuvi en la Señora Fiesta quu’organiza Rodrigo Cuevas en Vegarrionda y prestóme pola vida. Dan pote roxu de peltre, por ciertu, en vez de vasu plásticu. Destacar la participación, la collaboración de la xente, la hermandá y el bon rollu, aparte la calidá les actuaciones. Paezme una maraviya qu’heba xente como él enfotaos en  recuperar fiestes pa dar vida a los pueblos, pero fuxendo de misa y ramu. Per Piloña, a lo que tamién me presta munchuo dir y soi socia, ye a los conciertos del Bocanegra, qu’un directivu de l’asociación tamién ye d’El Natahoyo, por ciertu.

Un muséu pa recomendar: Si tengo que quedame con un Muséu, pa min ye’l Arqueolóxicu. Descubrílu cuando facía Hestoria na plaza Feijoo y yera una colección decimonónica de pieces amontonaes. Ellí alcontréme col sepulcru y la llápida de la mio Gontrodo, qu’agora tan nel claustru llimpios y destacaos, pero nin se veíen. Y ellí ta’l Picu Asturiense, esi minutu de gloria que tuvimos nel Neolíticu, onde inventamos esi instrumentu líticu, únicu nel mundu, que consigue más metru de filu por quilu de piedra que nengún otru.

Un momento de la hestoria d’Asturies que te prestaría vivir: ¿Momentu de la Hestoria? Téngolo claro. Cuando les tribus qu’habitaben los 300 castros d’Asturies se llevantaron contra Roma nel 29 ac, nuna contienda que duró diez años y de la que nos queda como emblema La Carisa. La mio novela La Diosa contra Roma fala della y de aquel matriarcáu orixinal nos pueblos del Norte que cuntaba Estrabón. Diz muncho de lo que somos y pa lo que quedamos, el fechu de que se celebre la Romanización y faigan fastos conmemorativos d’ella, mientres el Festival Astur Romanu de Carabanzu se fuera a pique, como les escavaciones arqueolóxiques, por falta financiación.

Un baille pa pasalo bien: Soi una vieya roquera, agora, en Lorient, apuntábame al Fest Noz corriendo. La música celta y, en concretu, les dances bretones, son pegadices y saltarines

Una pallabra n’asturianu que te preste: Maizón. Entre maizones y babayos, asina tamos.

Una tradición que nun pue perdese: La de faer vinu nel Occidente. Yá ta constatada la vinicultura nos sieglos VIII y IX asociada a los conventos y da gustu ver como se ta recuperando. Hai un rapaz ventiañeru, Adry Fernández, qu’amás ye músicu, que ta faciendo un vinu escelente con denominación d’orixe de Cangas, El Señorío de Ibias, fechu con uva albarín blanco d’alta montaña d’unes vides centenaries ye pa morrer. La muerte es mía, momentu publicitariu. (rises)

Una espresión n’asturianu que te preste: Cuando perblando, cuando perduro, nunca ta contentu’l güeyu del culu. Hai muncho repunante pel mundu, cada vegada más.